Gullkaka

Gullkaka og ekki orð um það meir

Kakan:

½ bolli volg mjólk

1 msk smjör (brætt)

2 egg (við stofuhita)

1 bolli sykur

1 tsk vanilludropar

½ tsk salt

1 bolli hveiti

1 tsk lyftiduft

Gullið:

6 msk smjör

10 msk púðursykur

4 msk mjólk

8-10 msk kókosmjöl

(Ath upphaflega uppskriftin að kókosgullinu sem ég fann var helmingi minni og það er bara nánasarlegt og frekar glatað og þar var líka talað um 3-4 msk af kókos en ég ætla ekki að spara kókos fyrr en það kemur aftur kreppa. Þar að auki er alltaf talað um smjörlíki en ég á aldrei smjörlíki svo ég notaði smjör.)

Tæki og tól:

Hrærivél eða handþeytari (eða einhver algjörlega nötts ættingi eða nágranni.)

Smelluform c.a. 20 cm í þvermál

Bökunarpappír klipptur í hring og settur í botn formsins

 

Aðferð:

-Hitaðu ofninn í 175°C uppi og niðri. 

-Hitaðu ½ bolla af mjólk og bræddu 1 msk af smjöri í potti. Leyfðu að kólna aðeins.

-Þeyttu saman 2 egg (við stofuhita) og 1 bolla af sykri í hrærivél þar til blandan er létt og ljós. 

-Sigtaðu nú 1 bolla af hveiti, 1 tsk lyftiduft og ½ tsk salt í egg og sykurblönduna og hrærðu hægt saman. 

-Blandaðu 1 tsk af vanilludropum við mjólkina og smjörið í pottinum. Passaðu að það sé ekki mjög heitt þegar þú blandar því við deigið í hrærivélinni. Best er að setja um það bil kúfaða matskeið af deiginu í mjólkurblönduna og hræra við. Þetta er allt gert til að búa ekki óvart til eggjaköku. 

-Hrærðu deigið þar til allt er blandað saman. Helltu svo deiginu í smelluformið og inn í ofninn og bakaðu í 25 mínútur eða þar til bakan er byrjuð að gyllast að ofan. 

-Stingdu prjóni í kökuna og athugaðu hvort hún sé bökuð í gegn

-Á meðan kakan er að bakast þá seturðu kókosmjólið, smjörið, mjólkina og púðursykurinn í pott og hrærir saman þar til sykurinn er orðinn að drullu, smjörið brætt og blandan byrjuð að bubbla. 

-Taktu kökuna úr ofninum og settu kókosgullið ofan á og skelltu aftur í ofn í 6 mínútur eða þar til kókosinn er aðeins byrjaður að taka við sér.

-Leyfðu kökunni að jafna sig og kólna í forminu í svona 20 mínútur amk eða þar til kókosinn er búinn að kólna nóg þannig að kakan liðist ekki í sundur og eyðileggi fyrir þér daginn

-Gott að bera fram með rjóma eða vanilluís

Aukaskref (valkvæð):

-Fáðu afkvæmi þitt til að hjálpa þér að baka kökuna þar sem að snemmunglingurinn bað nú einu sinni um hana

-Reyndu fyrst að sannfæra afkvæmið um að fara út í búð og kaupa poka af möffins til að fara með í staðinn í pálínuboð skólans á morgun af því að þú nennir ekki að gera neitt nema lesa glæpasöguna sem þú dast inn í í fyrradag

-Ekki gleyma að segja afkvæminu söguna af því þegar að það bað þig um að fá að fara með eplaköku í síðasta pálínuboð og nennti ekki að hjálpa þér og þú endaðir á því að skræla eplin og gera allt sjálf seint um kvöld og svo kom kakan hálfétin til baka úr skólanum

-Maldaðu í móinn en mundu að það er svo stutt þangað til að blessað barnið vill ekkert með þig hafa. Svo er bara gaman að baka saman

-Minntu snemmunglinginn aftur á að hann ætlar að hjálpa þér

-Leggðu þig fram við að halda afkvæminu við efnið

-Horfðu fram hjá því þegar barnið ákveður að nota tímann til að lemja í sundur harðnaðan púðursykur af því að það er skemmtilegra en að fara eftir uppskrift með afskiptasömu móður sinni sem er alls ekki skemmtileg þegar hún bakar

-Gargaðu þegar þú kemst að því að gólfið er allt út í sykri og barnið er horfið inn í herbergið sitt

-Náðu í afkvæmið og segðu því að þrífa upp eftir sig

-Skúraðu gólfið því að börn kunna ekki að þrífa almennilega

-Kláraðu að baka og þrífa

-Taktu eftir en aðeins of seint, að barnið rak sig í stillinguna á ofninum og hitinn er því 200°C en ekki 175°C og kakan því byrjuð að brúnast allt of hratt og ekki orðin bökuð í miðjunni

-Opnaðu ofninn og reyndu að kæla hann með þolinmæði sem þú býrð ekki yfir á þessum tímapunkti

-Gleðstu yfir því að afkvæminu finnst gaman að búa til gullið sem á að fara ofan á kökuna

-Fáðu samviskubit yfir að vera micromanaging kröfuhörð manneskja og fáðu tár í augun þegar yndislega afkvæmið þitt býður þér vatnsglas

-Mundu svo að leggja inn á framtíðarreikning barnsins fyrir sálfræðitímum í framtíðinni

Aukaefni:

Tengdafjölskylda mín kallar kökuna sjónvarpsköku en fjölskylda mín kallar hana gullköku. Deilurnar um nafn kökunnar voru á gamansömu nótunum en ég er svo mikill besserwisser að ég linnti ekki látum fyrr en ég fann uppskrift að gullkökunni heima hjá ömmusystur minni í Bitrufirði. Sigrihrósandi tók ég mynd af uppskriftinni og benti tengdafjölskyldunni á að hún væri skrifuð fyrir tíma sjónvarpsins. Þú getur því þakkað forsjóninni að vera hvorki skyld mér né tengd mér fjölskylduböndum.